Өнөөдөр хулгана, луу, бич жилтний жилд ганц тохиох хийморийн буулттай өдөр
Агын тооллын 2019 оны нэгдүгээр сарын 17. Пүрэв гараг. Билгийн тооллын XVII жарны “Тийн унжлагат” хэмээх шороон нохой жилийн Өвлийн адаг хөхөгчин үхэр сарын 11. Бархасвадь гараг. Чөлөөт эх одтой, хоёр хар мэнгэтэй, хөх бар өдөр. 
Барилдлага: Үл тохирох
Шүтэн барилдлага: Төрөхүй
Суудал: Мод
Өдрийн наран 8 цаг 33 минутад мандан, 17 цаг 30 мминутад жаргана. Тухайн өдөр морь жилтнээ аливаа үйлийг хийхэд эерэг сайн ба үхэр, луу, хонь, нохой жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй.
Эл өдөр хууль цааз гаргах, батлах, хэрэглэх, хулгай дээрмийг номхотгох, гэмтнийг шийтгэх, мал адгуус номхруулах, хараал, жатхыг буцаах, амьлуулах, өглөгийн түллэг хийх, хишиг дуудуулах, хот балгадын үйл, цэрэг, цагдаагийн үйл, гэр, байшингийн суурь тавихад сайн.
Золиг гаргах, бомбын үйл, бэрийн үйлд муу. Өдрийн сайн цаг нь хулгана, үхэр, луу, могой, хонь, нохой болой. Хол газар яваар одогсод хойш мөрөө гаргавал зохистой. Үс шинээр үргээлгэх буюу засуулбал эрхтэн хурц болно хэмээжээ.
Хулгана, луу, бич жилтний жилд ганц тохиох хийморийн буулттай өдөр тохиож буй учир гурван жилтэн хийморийн сан тавиулж, хийморийн дарцгаа цог хийморийн зүүн зүгт хийсгээрэй.
Түүнчлэн эцэг эхийн ачийг хариулж, аливаа буяны үйлд шамдваас тэр жилийн гай барцад арилж буян хишиг дэлгэрэх, санасан хэрэг саадгүй бүтэх бэлгэ дэмбэрэлтэй.
